ياهووو

صيف 2009 ياكم

سلالالام عليييهم
اشلونكم و شخباركم يا قرائي الكرام

شمسوين ويا هالصيف
احم احم ادري الصيف بدا من فتره لكن انا ما حسيت فيه الا الحين بعد ما خلصت الاسبوع اللي طاف من فاينلي هي هي

كان فاينلي يوم الثلاثاء 7 يوليو 2009
و الحمدلله ان شاءالله قدمت زين و الله كريم
و اللي جاوبوا صح راح يحصلون على تشكيله متنوعه من أرقى اصناف الككاو المعتق (طرشي مو ككاو) من موقع فيه كويتي ؟ هي هي

عذروني شوي وايد مشغول لاني أداوم العصر و الصبح مرّات افضي و مرّات لأ
بس ان شاءالله الصيف يكون كووول مثل السنه اللي طافت بس خل ارتب اموري

و اشكر كل اللي ردوا على مواضيعي و ان شاءالله راح ارد عليهم باقرب وقت ممكن

مساكين اللي متعودين يسافرون كل سنه انفلونزا الخنازير خلتهم يقعدون بمكانهم

عاد متشوق حق السباحه في البحر لكن الجو مو شي نوعاً ما بس ان شاءالله نحصل فرصه زينه

ييه على بالي تصميم و بما اني من زمان مو مستخدم الفلاش فقلت بسوي تصميم خفيف نسخن فيه يمكن الله يهدينا و نصمم مره ثانيه

بوريكم اياه و قولولي رايكم
كنت بسويه فيه شغلات اكثر بس ما حبيت أتأخر فيه اكثر من جذي

و اتمنى لكم صيف ممتع و نهاية الصيف ان شاءالله اعطيكم تقريري ، تقرير مستر جوكليت في صيف 2009

في أمان الله

تبي تعرف تاريخ عيد ميلادي ؟

طبّق ما تعرفه

صارلي فتره قاطع النشاط الإنترنتي ، فصاير لا اشوف ايميلاتي و لا اقرى بلوقات و لا شي ، لاني في حالة دراسه و استعداد حق الإمتحان المصيري بالنسبه لي

امتحان الحسبان أو ال
Calculus

وايد احاتيه و لازم اخلصه و الله يسهل ان شاءالله

أمس و انا احوس بالملفات مريت على كتاب الكتروني مترجم قريته قبل فتره اسمه : طبّق ما تعرفه

ترجمة / ميّ
By. Maioona.com
ترجمة لكتاب
Know Can Do Put Your Know-How into Action
By: Ken Blanchard, Paul J. Meyer & Dick Ruhe

باختصار يتكلم الكتاب عن ان لازم اللي نتعلمه نطبّقه علشان لا ننساه ، لان الانسان بطبيعته ينسى بعد فتره من تلقيه محاضره تعليميه معينه و بعد فتره ما يظل الا معلومات نادره في ذاكرته و تبقى على الورق يمكن ، فلازم نطبّق ما نعرفه علشان لا ننسى

فالكالكوليس او الرياضيات بشكل عام اذا ما نمارسها بشكل مستمر راح ننساها ، حتى دراستها تتطلب هالشي ان نحل مسائل علشان نفهم الافكار و مو نحفظهم

فقلت ليش ما ألف مسأله من اللي قاعد اتعلمه بحيث يكون حلها اهو جواب لشي معين ؟

يالله يا شطّار شدوا حيلكم معاي ، راح اعطيكم مسئلتين و اللي يحلهم راح يعرف معلومتين في حياتي

السؤال الأول

الجواب راح يكون عباره عن تاريخ امتحاني الفاينل بشكل
YYYYMD
بحيث
YYYY
اهو السنه و ال
M
اهو الشهر و ال
D
اهو اليوم

السؤال الثاني


الجواب راح يكون عباره عن تاريخ عيد ميلادي بشكل
YYYYMD
بحيث
YYYY
اهو السنه و ال
M
اهو الشهر و ال
D
اهو اليوم

و اللي يحله بلززز لا يحطه بالكومينت

يدزلي الجواب ايميل على
mr_chocolate_q8@hotmail.com
او يضيفني بالمسنجر و يقولي

و اللي يبي نسخه من الكتاب يكلمني على الايميل بعد و حاضرين

اتمنى لكم التوفيق و مبروك للتي تخرجوا من الثانويه و اتمنى لهم كل التوفيق و النجاح

مع السلامه ^_^

زيارتي للكنيسة الكاثوليكية في الكويت - My visit to the Catholic Church in Kuwait

احترام الأديان السماوية واجب

الديانة المسيحية هي أحد الأديان السماوية التي أنزلها الله سبحانه و تعالى على البشريه كما أنزل الإسلام و اليهودية ، و سيدنا عيسى عليه السلام هو النبي المرسل لهذه الديانه

في الكويت و الحمدلله هناك احترام لهذه الديانات السماويه ، فهناك كنيسة أو كنائس (و هي مكان العبادة للديانة المسيحية) في الكويت ليمارس متبعي هذه الديانة طقوسهم الدينية و الروحانية

فأحببت أن أزور أحد الكنائس في الكويت و أتلمس المكان عن قرب ، فقررت أن ازور الكنيسة الكاثولكية (الكاثولكية هي أحد طوائف الدين المسيحي) التي تقع على شارع السور في مدينة الكويت ، فهدفي من هذه الزياره هو رؤية البناء الداخلي و النقوش و التماثيل داخل الكنيسه بالاضافه إلى معرفة جو الكنيسه بشكل عام.

موقع الكنيسة على شبكة الانترنت :
http://www.catholic-church.org/kuwait
رافقني في هذه الزياره الصديق العزيز الدبلوماسي صاحب مجموعة الدبلوماسي البريديه
http://www.diplomail.com
و كان مسار الرحله يبدأ من مجمع ديسكفري في مدينة الكويت ، علشان نلعب بولينغ هي هي ، و من ثم توجهنا للكنيسة الكاثوليكية ، يمكنكم مشاهدة لعبة البولينغ في قسم السوالف في موقع الدبلوماسي.

جولتي التصويريه في الكنيسة كانت بسيطه و ذلك إحتراماً لمتبعي هذه الديانه و حتى لا اقطع خشوعهم أو اشعارهم بعدم الراحة و الرضا

مصدر الصور القديمه للكنيسة :
http://www.flickr.com/photos/58789412@N00/sets/72157594514181851/

صورة الكنيسة من القوقل ايرث

وصلنا الكنيسة

شكر و عرفان

بعض الصور و الاعلانات قبل المدخل
بعض الماء المبارك عند المدخل
تخليداً لذكرى
الأسقف الجليل

تيوفانس اوبالدوس
ستيلا الكرملي

أول أسقف على الكويت
4 يونيو 1955 إلى 14 يناير 1966

ولد في كريمونا - ايطاليا في 14 يوليو 1910
توفي في ميلانو - ايطاليا في 9 نوفبمر 1978
منظر عام للكنيسة
أعتقد يسمونها غرفة الاعتراف
في أجواء الكنيسة



بره الكنيسه

اهني كان معلق نفس أقفال و رابطين قطع قماش بيضه و كان في حمامه بيضه قاعده

و احنه ماشيين مرينا على كنيسه ثانيه اللي اهي الكنيسة الانجيلية الوطنية

" تعالوا الي يا جميع المتعبين و الثقيلي الأحمال و أنا أريحكم " متى 11 : 28

بالنسبه للكنيسة الكاثوليكية توقعتها أحلى من جذي و الاضاءه كانت وايد باهته و عاديه ، يمكن ازور كنائس ثانيه في دول ثانيه و اكيد راح تكون أحلى

أتمنى تكونون استمتعتم في رحلتي و ان شاءالله لنا لقاء ثاني ، طبعاً صار غبار و انصدمنا من الجو اللي قلب مره وحده و سيارتنا بعيده بسبب البناء لمشروع الدائري الأول بس عدت على خير

مع السلامه

زيارتي لسوق الجمعه - My visit to the Friday Bazaar

ما لا يخطر على البال و الخاطر !

دايما ما كنت أسمع عن سوق اليمعه (الجمعه) بس عمري ما زرته ، و كنت اسمع ان السوق اللي تلقى فيه كل شي ، كل ما لا يخطر على البال و الخاطر ، يعني اشلون كل شي ؟ ، يعني في شغلات مو موجوده مثل السيايير و الطراريد و الطيايير ، لكن في اشياء ثانيه غريبه عجيبه و ما تتوقع انها تنباع

يمكن تكلم عنه الأخ مطقوق
http://www.ma6goog.com/2006/10/blog-post_10.html
او غيره من المدونين من قبل

لكن حبيت اسوي زيارتي بطريقه جوكليتيه هي هي ، طبعاً رافقني بهالزياره و لأول مره على مدونة فيه كويتي ؟ الأخ العزيز الدبلوماسي صاحب مجموعة الدبلوماسي البريديه
http://www.diplomail.com
و راح تشوفون سالفته عن سوق اليمعه بقسم سوالف الدبلوماسي

كان مسار الرحله من سوق الحمام لي سوق اليمعه ، أنا ما صورت شي بسوق الحمام خليتها على الدبلوماسي ، و حبيت اركز على سوق اليمعه


طبعاً بالأول كان سوق اليمعه عباره عن سوق شعبي في براحه و فيها بسطات و يبيعون فيها ، تقدرون تشوفون صور للسوق القديم اهني
http://travel.maktoob.com/vb/travel63913
و سموه بسوق اليمعه لان الناس كانت تتواجد اكثر يوم اليمعه خاصة بعد صلاة اليمعه ، لكن ألحين كشخوهم شوي و حطوا لهم مظلات و بسطات مقسمه للأجار ، و كل من يترزق الله فيها بطريقته الخاصه ، بالاضافه إلى بعض الخدمات مثل المسجد و دورات المياه و الكافتيريات و بعض المطاعم و البنوك

خلونه ناخذ جوله بالصور و نشوف (تقدرون تضغطون على الصور علشان تشوفونها بشكل أكبر)

صور عامه للسوق

خرابيط

بواكه و حزم
مكاين خياطه قديمه
هارد دسكات
جدور
مقالي
قفاش أو ملاعق
خلاطات
موزعات كهربا
اشتراكات سيايير

هذا واحد لقيته يحري على مظلات عليها شعار شركة طفل المستقبل ما أدري من وين خامطهم و يقول : على دينار على دينارهههههه

مظلات
تكرمون نعل و كور

كريمات
عده للكراج
عطور
سلاسل و أحزمه للسحب
مافيه طرّاد لكن فيه ماكينة طرّاد
ماكينة تنعيم شكلها قديمه
هواتف نقاله و ملحقاتها
اهداء حق عشّاق ال
Apple

إهداء حق عشاق الفيديو جيمز خاصة
http://neoark25.blogspot.com/

أثقال حق المجسمين
أدوات للزراعه
منو فيه هوشه ؟
دسوس أو قفازات
ماكو بينهم المصباح السحري ؟
فاكس أيام قبل
إهداء حق هواة تصوير الأفلام
اكتشفنا ان ماسكينها بالمقلوب بالأول هي هي فعدلناها

على فكره ما كانت ايدي هذي ايد الدبلوماسي هي هي ، اهو يحب الككاو بعد فجذي أسمر هههههه

إهداء حق شركة زين
تلفونات كلاسيك
يا زين اللون جوكليتي
حتى العمي يشوف اللأرقام شدعوه هالكبر
يقصون عليكم القهاوي شوفوا من وين اييبون شيشهم هي هي

تكرمون جواتي

كل الأشياء اللي شفتوهم ترى أغلبهم اشياء مستعمله تخيلوا يعني تشترون جدر أو ملعقه أو تكرمون جوتي أو نعال مستعمل شي غريب
طبعاً مرينا يم قسم كله ملابس معلقه للبيع يديده و مستعمله اكثر شي ، لكن ما جذبنا الا شي واحد هههههه ، اللي خلاني اوقف و انادي الدبلوماسي (دبلو) علشان ايي يشوف و قزرناها تصوير ، راعي البسطه يقول نا : اشتروه بدال لا تصورونه هههههه

تبون تعرفون شنو اهو الشي ؟

أقدم لكم بالطوا مختبر للعلوم المرصع بالذكريات

نخيتج يا حياة لا تنسينهم هي هي

سجاد

تلفزيونات مغلفين بعد هي هي
رسيفرات
ثلاجات و وحدات
آله طابعه من ما ادري أي سنه
بداله حجريه
آله حاسبه
صوره عامه للأثاث
كنت بدور ثلاجه عليها ستكرات وايد بس ما لقيت الا هذي هي هي
غساله حجريه
فيديو حجريأعتقد مكسر حجري
سيفتي شوز صناعه هنديه بعد
مواعين قديمه
مولدات كهربا
سرير طبي
الظاهر بايقينه من الجمعيه هههههه
ألعاب يهال
الصيف ياي
نهاية الماركات
النهايه

خلصنا هي هي ، شاهدتم مع السلم ما يقارب ال 80 صوره
و يمكن فيه اشياء ما لحقت اصورها
هذا لما يقولك : كل شيء تحت سقف واحد هي هي

فناتق السلم

السلم و أفكاره الغريبه

الموضوع طويييل اقروه على كيفكم

اللي يعرف سلوم (اللي اهو أنا هي هي) عدل يدري ان مرات يطلع بطلعات غريبه و أفكار الا بسويها ، و اخذ من اللي يؤيدك و يعارضك

بالايام الاخيره طلعت بجم فناتق (يعني ممم حركات هي هي) مقرر اسويهم ، في بعضهم سويتهم و البعض تراجعت عن فكرتهم و في بعضهم لما ألحين افكر فيهم

بداية بسالفة الحيوانات الأليفه بعد ما شريت سوسو اللي تكلمت عنها في هالموضوع

http://feehq8i.blogspot.com/2009/03/soso-my-pet.html

خذت ريلي على سوق الحمام ، و قمت استمتع اني اروح هناك و اشوف شكو ماكو ، فبعد ما عرفت ان سوسو ذكر ، فخذيت سلحفاة ثانيه سميتها فوفو بس نثيه ، بس الظاهر غلطت بالقياس

ممم شوفوا سوسو و فوفو

سلالالام أنا فوفو ... و أنا سوسو آآآه

لا تصورني استحي :$

فرق بالحجم صح هي هي

و ماشاءالله تونس فوفو نشيطه مو نفس سوسو كسوله و تعرفني اول ما تشوفني اطلع من البيت تلحقني هههههه

بغيت اشتري سلحفاة ثالثه بس غيرت رايي لان بس هذيل كافيين و يونسون


فكرت ذاك اليوم اسوي لهم بيت من خشب ، علشان احط الأكل داخله بدال لا احطه بالحوش و ايون الحمام اللي يحومون حولين البيت و ياكلونه و ما يخلون لهم شي ، اول مره اشوف حمام ياكل خس و خيار ، الله يهداكم خلوه حق سلحوفاتي ماكو ، فرحت للنجار الايراني اللي في جمعيتنا ، وقلت له : ابي صندوق جذي قياسه ، قال لي : حق شنو تبيه ، قلت له : بحط فيه حيوانات ممم سلحفاة ، استغرب ما يعرف شنو يعني سلحفاة لما رسمته له ، جان يضحك قال لي: ايي هذي اسمها .... ، ما ادري شنو بالفارسي هي هي ، و ذاك اليوم سئلت الحلاّق الباكستاني مالي : تعرف شنو يعني سلحفاة ؟ ، قال لي : لأ ، جان ارسمه له ، قال لي : ايي هذي اسمه قجوه (ج نفس شاي بالكويتي) ، و يقول في باكستان اكو منها وايد هههههه ، النجّار بعد ما خطط لي الصندوق قال لي : اسويه لك بسعر 15 دينار تقريباً ! ، شدعوه كله صندوق متر بنص متر 15 دينار ليش ، قلت خل اشوف السوق يمكن احصل ارخص و اذا ما حصلت اردله ، وانا ادور منجره ثانيه ، دقيت على خالي سئلته اذا يعرف منجره زينه ، قال لي : ليش تسوي صندوق خشب اشتر لك صندوق بلاستيك و افتح فيه فتحه ، قلت اي والله ليش ما اسوي جذي ، و شريت صندوق بلاستيك نفس القياس اللي ابيه و بسعر 4 دنانير تقريباً و حطيت فيه تراب خذيته من أحد البيوت اللي تنبني طبعاً بعد ما استأذنت ، و حطيت السلاحف ، حسيت كسروا خاطري صار المكان صغير عليهم ، فغيرت رايي و طلعتهم و رديتهم بالحريه المطلقه بالحوش ! هههههه

السلاحف لما كانوا بالصندوق على التراب
يبون يطلعون مساكين

طبعاً بعد ما شريت السلاحف اختي العزيزه ام كشه غارت و قالت لي : كيفك تشتري لي همستر ، فوصيت ناس يعرفون بالهمسترات اييبون لي ، و يابوا لي همستر صغنونو شيطان ، استانست عليه ، اليوم الثاني رحت شريت ذكر و نثيه زياده لكن من نوع ثاني ، لان ايي انواع ، روسي و هولندي و سوري ، و اللي يعرف لهم يعرف شنو نوعه هذا ، بس يبيلهم شغل شوي الصراحه تنظيف كل اسبوع و ما ادري شنو فقاعد افكر اوزعهم

معلومات عن الهمستر :

http://en.wikipedia.org/wiki/Hamster

اذا في أحد يبيهم يقولي و خل ياخذهم من غير مقابل

هذا قفص الذكر و النثيه
قاعدين داخل البايب ، شسووون ؟

اليوم نظفتهم ، لكن واحد منهم سوالي فلم هندي ، لان و انا قاعد اصور النثيه الشقره ، جان الذكر الأسود ينحاش من القفص و تعال حوس دوره ورا الأغراض اللي تحت السلم ، صج صج أذاني ، بالنهايه يبت قوطي روب ، و صدته فيه حاس حاس حاس ، جان اقربه يم باب الحوش و احذفه بره ، لان بالحوش لعبتي المكان وسيع و اقدر اصيده وين بينخش ههههههههههههه ، و مسكته و قطيته ويا زوجته بالجيس على ما انظف بيتهم

هذا قفصهم قبل التنظيف

لو تلاحظون أنا شايل البايبات علشان اذوني كله ينخشون بالبايب جنه ما عندهم بيت ، فشلت البايبات و غيرت تقسيمة البيت ، فصار اوكي ، فقاموا ينامون بالبيت و يلعبون باللعبه

هذيل البايبات

هذي النثيه بعد ما طلعتها مو مخليتني اصورها تحوس تحوس جكيتها بصوره بعدين حطيتها على طاوله رفيعه علشان اصورها هي هي

داخل الجيس أثناء التنظيف

و هذا الثاني زاكي حسب ما مسميته اختي ، هذا على نياته عنونو هههههه بس مرات يعض

قبل التنظيف ، زاكي منخش تحت قوطي الروب شسوي ما حصلت له بيت بروحه ينباع
يحوس بالقفص و يلعب بلعبته المفضله
من فوق الطاوله

و هذا بيتهم بعد التنظيف

هذا أكلهم عباره عن حب شمسي و ذره مجففه و قمح منوع يعني

ياكلون

الهمسترات حيوانات ليليه فتشوفونهم بليل يحوسون و بالنهار نايمين ، يالله وقت النوم مع السلامه نخليكم

و مثل ما قتلكم اللي يبي الذكر و النثيه يقولي لان بوزعهم و قاعد أدور أحد ياخذهم ، و راح اعلمكم عليهم اذا خذيتوهم ما يعضون بس يخافون ، و يعضون اذا حبستهم بايدك و عضتهم ما تعور

و أحد الفناتق الثانيه اللي طلعت لي

تدرون يا جماعه الجو بالكويت بالصيف ماشاءالله حااار ، و أنا وايد أحتاج أشرب ماي و سوائل ، فاذا خليت الماي بالسياره و ارد له يصير ماي مغلي مو ناقص الا ازيده جاي (شاي) أو قهوه و اشربه ، فاشلون نحل المشكله ؟

قرر السلم يشتري ثلاجه للسياره ، و بعد البحث و التحري بالمنتديات و جذي ، عرفت انها تنباع في محل ينقاله السنيدي ، اهو محل سعودي بس له فرع بالكويت ، وكيله الشايع مارين

مكان المحل سهل ، بعد ما يخلص شارع جسر الغزالي ، اخذوا فرعي يمين قبل لا تصعدون الجسر اللي يوديكم اشارة الجامعه ، بعدين ثاني لفه يمين ، ايي تقاطع اخذوه يسار ، تلقون المحل على يمينكم

و هذي صوره حق كرت المحل

طبعاً انا حصلت ثلاجات مثل اللي بالكتروزان و في مركز سلطان مالت بلاك اند ديكر ، لكن هذيل يشتغلون على مراوح بس يحافظون على البروده ما يبردون ، لكن اللي حصلتها فيها كومبريسر ، يقولون صناعتها صينيه و كوبريسرها ألماني ، طبعاً لقيتها بسعر 140 دينار سعة 40 لتر و في أحجام ثانيه ، لكن بعد ما فكرت و قلبتها و استشرت خالي العزيز ، قال لي : ان ما تنفعني لاني ما امشي مسافات طويله ، مع ان الريال مال المحل قال لي : بعد نص ساعه تجمد و و مطلوبه وايد ، فقلت خلاص اشتري صندوق تبريد و احط البطول مالوت الماي و احط ثلج احسن

و هذا اللي شريته من ماركة Coleman

http://www.coleman.com

هذا البرّاد سعة 7.5 لتر نفس هذيل

http://www.coleman.com/coleman/ColemanCom/subcategory.asp?CategoryID=8530

لكن ما حصلت صورته

و هذيل نفس قوالب الثلج ، احطهم بالفريزر يتجمدون و أحطهم بالبراد علشان يحافظون على البروده بدال الثلج و اذا ذاب السائل اللي فيهم احطهم مره ثانيه بالفريزر



والله فادوني لكن هم بخاطري ثلاجه لكن نشوف وقت ثاني

و آخر فنتق حالياً افكر اسويه

بخاطري كرسي هزّاز أو يسمونه بالانجليزي

Rocking Chair

لان مجربه من قبل و مريح و ينفع وقت القراءه و التفكير ، لكن مابي أي كرسي ابي نفس الموجودين اهني

http://www.rockingchairs.com

أو اهني

http://www.therockingchaircompany.com

و اهني

http://www.everyrockingchair.com

يعني مابي نفس اللي حصلتهم في الفروانيه بالضجيج جنهم قنفه أو من جلد لانهم كبار شوي و انا ما عندي مساحه كافيه

عندكم فكره وين احصل مثل هالكراسي الخشب بالكويت ؟

اتمنى تفيدوني

ممم شنو بقى هي هي ، ماكو فناتق بعد خلصوا جنه

ايي صج ذاك اليوم مريت مركز سلطان جان اشوف شي يديد @@

تويكس ككاو ابيض لذيييذ

خل اشهيكم شوي

يمي يمي

تذكرون موضوع فيونكات هذا
http://fyonkat.blogspot.com/2009/04/blog-post_25.html

طبعاً الأهل متابعين البلوقات بعد فقالوا بسوونه لكن بطريقه ثانيه

كاب كيك و نوتيلا مخلوط ويا قيمر ويا مارشميلو

شرايكم نسوي مسابقة أحلى طبق حلو بالبلوقات هي هي

ترقبوا الياي يا اصدقائي هي هي

و اشكركم على صبركم و قرائتكم للموضوع

و حياكم الله مع السلامه

رسالة طفلة كويتية

ياللي تحب الكويت ... لا تقطع الآمال

أنا ولاء ... و أنا بنت الكويت ... أبي أقولكم قصتي ... و أبي أقولكم كلمتين ... أبوي سمّاني ولاء بمعنى ان يكون ولائي للكويت ... الكويت وطني العزيز ... اللي اهتم فيني من أنا كنت في بطن أمي ... لما أكون مدفونه في أرضه ... وطني علمني ... اهتم بصحتي ... خلاني أعيش بكرامه و عزه ... خلاني أفتخر اني أقول أنا كويتيه ... ليش يا أهل ديرتي تغيرتوا ؟ ليش خليتوا الكويت رخيصه في عيونكم ؟ ليش تفرطون بهالنعمه اللي اسمها الكويت ؟ ... يا أهل الكويت يا أهلي يوم السبت يومكم ... انتوا بإيدكم توصلون اللي قلبه على الديره قبل لا يكون قلبه على الكرسي الأخضر ... علشان يكون مجلس الشعب ... الشعب الكويتي ... مجلس انجازات للكويت و أهلها و مو مجلس تأزيم و تشتيت ... أحبج يا الكويت ... أحبج يا ديرتي ...

يا اللي تحب الكويت
لا تقطع الآمال
الكويت يا صاحبي
هي نهمة اليامال
الكويت أمك وأبوك
وهي ضحكة الاطفال
ياللي تحب الكويت
لا تقطع الآمال

سالفتي مع الشرطي الغبي

القافله تسير و الكلاب تنبح

اليوم صارتلي هالسالفه ، و ما حبيت أجلها لان في جم موضوع غيرهم ان شاءالله يايين بالطريج ، هالسالفه يمكن مو اول شخص تصيرله او يمكن صارتله بس بطريقه ثانيه.

الله يسلمكم اليوم كنت طالع مع صاحبي عقيل ، و مثل ما انتوا عارفين أنا و عقيل لنا مغامرات وايد في الديره ذكرتها بمواضيع سابقه.

بعد ما خلصنا مشوارنا ، سئلت عقيل اذا شايف من قبل طيور الفلامنغو بالكويت ، ما تعرفون طيور الفلامنغو او بالعربي يسمونهم النحام الوردي ؟ و ما تدرون ان عندنا منهم بالكويت ؟ ، بالعكس عندنا و اعتقد يكونون موجودين في مواسم معينه و وايد حلو منظرهم و في وايد هواة تصوير يحبون يصورونهم.

هذي معلومات عن الطير

http://ar.wikipedia.org/wiki/%D9%86%D8%AD%D8%A7%D9%85_%D9%88%D8%B1%D8%AF%D9%8A

http://en.wikipedia.org/wiki/Flamingo

فقال لي عقيل ان ما شافهم و لا يعرفهم ، قلت له خل نروح نشوفهم انا مرات امر عليهم بالغلط بس مو مثبت مكانهم فخل نروح نشوف.

فرحنا جامعة الكويت اللي بشويخ ، توقعت هناك ، لكن ما شفت شي لان الجهه اللي صوب البحر حاطين شجر و كان بليل فما يبين ، قلنا خل نروح صوب مستشفيات الصباح ، رحنا هناك المكان مافيه اضاءه و غريب علينا ، مشينا شوي مني مناك جان نحصل بحر ، قلنا يمكن اهني نحصلهم فدخلنا بالسياره شوي على الشاطئ مو مبين شي بالبحر فقلنا خل ننزل نشوف ، نزلنا من السياره و رحنا نمشي على ريولنا ، قلت خل اتصل على صاحبي اسئله ، قالي ان القاهم صوب المستشفى الصدري ( اللي كنا يما احنا ) أو بحر صليبخات او بحر الدوحه ، قلنا حلو احنا قراب يعني مو بعاد عن المكان اللي نبيه ، قربنا صوب البحر ما شفنا شي ، بس نسمع صوت طيور ، قلنا يمكن منخشين داخل الشجر اللي في البحر ، المكان خرمس ما يبين شي ، شفنا شي قلنا يمكن هذا اهو ، شغلنا ليت الفلاش مال التلفون و لا يطلع جيس ، قلنا خل نجرب نحذف صخره على الشجر ، حذفنا ما طلع شي ، كنا مفكرين نقرب السياره و نشغل الليتات.

شوي و لا عقيل يقولي : شوف هناك في دوريه يم السياره

قلت له : اي شكلهم حسبالهم قاعدين نسوي شي

شفناهم مشغلين الكشّاف على السياره يدورون اذا فيه احد هههههه ، فكنا رايحين لهم ، شافونا و دشوا بسيارتهم قربوا يمنا ، نزل الدريشه الشرطي و بدا الأكشن ...

الشرطي : السلام عليكم
احنا : و عليكم السلام
الشرطي : هذي سيارتكم ؟
انا : اي سيارتنا

الشرطي نزل و ترجل الفارس عن دوريته ، طبعاً كانوا اثنين بس شارلك هومز اللي يم السايق اهو اللي كان يسئلنا ، و نزل بعد وياه السايق مال الدوريه

الشرطي : شتسوون اهني ؟
انا : يايين نشوف طيور الفلامنغو
الشرطي بنفس خايسه : عطني عطني هويتك

طلعت له هويتي و خذا هوية صاحبي عقيل و مسكني على جنب خله عقيل يروح بعيد

الشرطي و اهو معصب يعني : شتسوون اهني
أنا : احنا هواة تصوير و كنا يايين نشوف طيور الفلامنغو الورديه اللي توقف على ريل وحده

قلت خل اشرح له يمكن ما يعرفهم

الشرطي : اي اعرفهم بس في احد ايي يشوف طيور الحين ؟
أنا : اي كنت ياي بشوف اهني مكانهم و لا لأ علشان ايي وقت ثاني اصورهم
الشرطي : و منو اللي وياك
أنا : هذا عقيل يصيرلي

بعدين راح حق عقيل قعد يسئله نفس الشي

بعدين رد لي قالي الشرطي : تعال

يبيني اوريه وين كنا واقفين

الشرطي : اوقف اوقف

قاعد يطالع الارض

اشفيه هذا حسباله بيلقى ابرة مخدرات و لا شنو بالضبط ؟

الشرطي : قولي شنو صار بالضبط

قلت له شنو صار ان حسبالنا هالجيس اللي على الشجره طير قربنا يمه و لا يطلع جيس و قلت له ان قاعدين نسمع صوتهم فقاعدين ندورهم ، حتى قلت له اسمع وياي

الشرطي : في أحد يجي يشوف طيور بليل ؟
أنا : قلت يمكن اشوفهم نايمين واقفين
الشرطي : انت عمرك شفت أرنب يطير ؟

ما ادري شعلاقة الأرنب بالسالفه

أنا : لا ما شفت
الشرطي : انا اشوف حوسه بالارض شنو انتوا كنتوا قاعدين
أنا : وين حوسه هذي ريولنا و ما كنا قاعدين
الشرطي و اهو يصرخ يعني يبي يخوفني : قولي شصار ترى مكانكم فيه شبه
أنا : يعني شنو تبي تطلعني غلطان ؟ يعني أنا أجذب عليك ؟

جان يقولي تعال ردينا يم الدوريه ، سئلني جم سؤال عن عقيل شسم اخوانه و وين ساكن و من هالكلام و معلومات عني و راح حق عقيل

يا معود لا يكون المحقق كونان و أنا ما ادري ترى اقصاك ارقام شاصي على جتفك

و عقيل قاله يعني لو كنا نسوي شي غلط بالله بنييلك ؟
لا و كان قايل حق عقيل ترى أحولك انت و الجيس التحقيق !!

هههههه

نطرت نطرت و رد لي

الشرطي : تبي اعطيك نصيحه ؟
أنا : اي تفضل
الشرطي : ابتعد عن هالطريج
أنا : !! شنو أي طريج !!
الشرطي : يعني انت ريال ماشاءالله
أنا : ادري الحمدلله أنا ريال

يعني هالشنب و هاللحيه مو تارسه عينك ؟

الشرطي : انا ابي مصلحتك
أنا : ليش شنو انا شمسوي يبا ليش انت فاهمني غلط ، يبا شباب و يايين يمارسون هوايتهم شالسالفه

بقلبي ليش تفكيرك منحط

الشرطي يغير الموضوع : تعرف شنو هالمبنى اللي وراك ؟
أنا ألف وراي و أرد عليه : اي هذا جنه جامعة الكويت او مستشفى القلب اليديد اللي قاعدين يبنونه
الشرطي : لا هذا مستشفى علاج الادمان و يمكن انت قاعد تهرب مخدرات حق أحد
أنا : !! لا يبا شالسالفه يات عليي أنا كا هناك في ناس قاعده و شكو أهرب مخدرات !!

طبعاً هذا الموضوع اهو طولها الغبي و مسوي نفسه شارلك هومز ما أدري المحقق كونان و قاعد يحقق على كيفه

آخر شي عطاني هوياتنا وقالي : مره ثانيه اذا بتجي اهني تعال بالنهار ، انا ادري ان اهني في فلامنغو اشوفهم بدربيلي
أنا : كا انت قلت بنفسك ان فيه فلامنغو فليش مو مصدقني ؟

حسيته انقص ويها

أنا : انزين ممكن اطلب طلب ؟
الشرطي : تفضل آمر
أنا : تبي الحين ادق لك على صاحبي اللي قبل شوي مكلمه و تسمع بنفسك ان اهو قايل لي عن هالمكان

طبعاً حس نفسه انصاد قالي : لا خلاص روح سيارتك

بعدين قعد يكلم عقيل و بعدين مشوا و ياني عقيل السياره

و مشينه بسلامتنا

اخواني الشرطه الشواصي لا تسوون نفسكم فهاميه و محققين على راسنا ، دام انك مو صايد عليي شي خلك ريال و احترمنا شوي ، و لو اني ما ادري انك شاصي و ما تفتهم جان ما مشيت الا و انا موضح لك الموضوع عدل ، لكن شسوي فيك مقيوله القافله تسير و الكلاب تنبح يعني الحجي وياكم ضايع.

و الله يعينكم يا اخوانا المصورين من هالاشكال

مع السلامه